Myanmar-a school beihnaah zirlaiten hliam an tuar

Myanmar-a Rakhine state-ah primary school pakhat chu kah a ni a, zirlai 19 velin hliam an tuar. 

School beih a nih chungchangah Rakhine state-a sorkar leh Buddhist helpawlte chuan an tih a nih lo tih an sawi ve ve. Sipaite leh helpawlte hian Rakhine bialah hian hun rei tak an inbei tawh a, inbeihna thleng vang hian mi sing tel chu hmun him an tlanchhe tawh a ni. 

Ningani zinga school kah fuh hi Khamwe Chaung khuaa mi a ni a, sipai thupuangtu Brigadier-General Zaw Min Tun chuan pawikhawhtu hi hel pawl an nih thu sawiin, zirlai hliam tuarte hi sipaite chuan damdawi-in panga-ah an dah tih a sawi. Zirlai hliam tuar zinga pakhat hi a dinhmun a ṭha lo hle nia sawi a ni bawk. 

Myanmar-a British embassy chuan nimin khan thuchhuah siamin, Rakhine state-a inbeihna thleng ṭhin chu titawp tawh turin a ngen. British ambassador Dan Chugg chuan sipai leh helpawlte inbeihna avang hian mi tam tak hrehawm takin an awm phah a ni, a ti. Civil mite himna chu ngai pawimawh turin pawl hnihte chu a ngen bawk.