Khawvela mihring 81% urban area-ah cheng

United Nations report in a tarlan danin, khawvela mihring 81% chu urban area, town leh city-ah an cheng a, an la pun chhoh zel a rinawm bawk.

Kum 2018-ah World Urbanisation Prospects report-ah khan urban area-a cheng hi khawvel mihring zinga 55% an ni a, mahse, ram hrang hrangten urban leh rural area an thliar dan a in ang chiah lo thung. Denmark-ah chuan mi 200 awmna chenna chin chu urban area-ah chhiar a ni a, Japan-ah erawh mi 50,000 chin chennaah bithliah a ni thung.

Report thar ber hi reseacher-ten ram leh reigon 237-te satellite leh national survey data aṭanga an zirchian niin, kum 2025-a urban area-a cheng chu 81% angin an chhut a ni. Khawpui lian, city-a cheng hi 45% awmin khaw lian, town-a cheng 36% an awm a, thingtlang lam rural area-ah 19% an cheng bawk.

Zirchianna an neih aṭang hian kum 2050-ah chuan urban area-a cheng hi 83% tling chho turin an chhut a ni. Khawpuia cheng pun zualna tur hi India, Nigeria, Pakistan, the Democratic Republic of the Congo, Egypt, Bangladesh, leh Ethiopia te niin an sawi. Kum 2050-ah Dhaka chu mihring chen tamna ber khawpui ni tura chhut a ni a, mihring cheng hi mi mtd 52.1 vel an tlin rin a ni. Mihring cheng tamna khawpui ni tura chhut zingah Jakarta, Shanghai, Delhi, Karachi, Cairo, Tokyoa, Ghuangzhou, Manila leh Kolkata te an tel.