Atlantic tuipuia lawng chesualah mi 58 thi

Africa khawtlang lama awm Mauritania aṭanga Europe pana kal lawng chu Atlantic tuipuiah chesualin, a hmunah hian mi 58-an thih thu UN migration agency chuan a tarlang. He lawnga chuangte hi Europe rama pem tumte an ni. 

He chetsualnaah hian hmeichhia leh naupangte pawh an thih thu tarlan a ni bawk. Mauritania tuipui hi an chhuahsan hla hman lo a, lawng chesuala dam khawchhuak eng emaw zat chu tuipui kamah an hleuh kai a ni. Mauritania hmar lama awm Nouadhibou khuaa damdawi-inah hliamte hi dah an nih thu thuneitute chuan an tarlang bawk. 

Africa khawthlang aṭang hian  Europe-ah hna leh awmna nghial nghet zawk zawngin pem turin mi tam tak an kal ṭhin a, heng mite hi tuipuiah an chesual fo a ni. Kumin chhung ringawt pawhin Atlantic leh Mediterranean tuipuia chetsualna thlenga thi hi mi 1,000 chuang zet an tling tawh. Lawngah hian mi 150 vel an chuang a, Gambia aṭangin November 27 khan a kalchhuak a ni. Lawng fuel tlem avanga chhiatna an tawh thu leh, lawng hi a khaikhup zawnga a inleh thu Inter­national Organization for Migra­tion (IOM) chuan a tarlang. 

He chhiattawhna hi kum 2000 hnu lama pem tumte phurtu lawng chetsualna liantham ber zinga mi a ni. Lawnga chuang mi 83-te chu tuipui kam lamah an inhleuh kai hman thu tarlan a ni. He chetsualnaa damkhaw chhuakte hi Mauritanian thuneitute chuan an lo bawihsawm a ni. Kum 2014-18 inkar khan Gambia mi 35,000 chuang chu Europe-ah an pem thu IOM chuan a tarlang. Africa khawtlhang lama awm ram ṭhenkhatte hi an ram rehtheihna avang leh politics lama buaina neuh neuh a awm avangin, Atlantic tuipui aṭang leh Mediterranean tuipui aṭangin Europe lamah hian hna zawngin emaw awmna ngialnghet zawk emaw an neih theih nan an pem lut fo ṭhin a ni.