Middle East-ah US-in sipai 14,000 dah lut dawn lo

Washington-in Middle East-a Iran ep tura sipai 14,000 dahluh a tum nia thuthang awm chu US chuan pha in, U.S. Department of Defense chuan Nilaini khan hemi chungchanga thuthang awm hi thu dik a nih loh thu an tarlang.

Pentagon thupuangtu Alyssa Farah chuan Twitter-ah, "Report awm kha a dik lo a ni. US chuan Middle East-ah sipai 14,000 dah luh belh tumna a nei lo," a ti.

Nilaini chawhma lamah khan Wall Street Journal report chuan president Donald Trump thuneihna hnuaiah Iran do let turin Middle East-ah sipai 14,000 dahluh belh an tum niin a tarlang a, tun thla chhung ngei hian Trump-a chuan hma a la nghal dawn tih an tarlang bawk. Hemi hnu lawk hian Pentagon chuan thu dik a nih loh thu hi thuchhuah an siam nghal a ni.