Brazil President hlui Bolsonaro tlanchhuah tum

Brazil president hlui Jair Bolsonaro chu 2022 inthlana a chak loh hnuah sorkar paihthlak tuma puhnaah thiam loh chantirin a inah pawn chhuak thei loa hren a ni a, mahse tlanchhuah a tum avangin Inrinni khan thuneitute kuta dah a ni.

Supreme Court chuan Bolsonaro hian aa kea monitor an vuahsak chu tihchhiat a, hmun danga tlanchhiat a tum niin a sawi. Bolsonaro erawh chuan a hriatchian duh vangin soldering rion hmangin monitoring bracelet hi tihchhiat a tum niina sawi thung. Court-in video a tihchhuahah monitoring bracelet hi a chhiat nasat bakah a kang tel bawk a; mahse, Bolsonaro hian a keah a la bun tho a ni. Supreme Court judge Alexandre de Moraes chuan hemi chungchang hi hrilhfiah turin Bolsonaro attorney-te chu a hriattir.

Kum 70 mi, Bolsonaro hi kum 2019-2022 inkar khan Brazil president a ni a, kum 2022 inthlanah Luiz Inacio Lula da Silva a hneh lo a ni. President atana Lula dah a ni tur hi tihbuai a, office luah thei lo tura ruahmanna siamah puh a ni a, kum 27 tang tura hrem a ni. August thla khan tan-ina tang kher loin, a chenna inah pawn chhuak loin, house arrest-ah hren a ni.

Bolsonaro fapa, Flavio Bolsonaro chuan Federal Police-ten a pa an la chu sawiselin, a chungah thil pawi a thlen chuan police mawhphurhna a ni ang, a ti. A pain ankle monitor tihchhiat a tum chu a chenna ina amah tlawhtu a chhungte hmuhah bun reng a zah vang leh, a rilru nat vang niin a sawi thung.