Gulf-a US indo lawngin Iran missile part nia hriat a man
US Navy indo lawng chuan Iran missile part nia hriat Arabian tuipui-ah an man.
Pentagon chuan Nilaini khan hemi chungchangah hian thuchhuah siamin November 25 khan US indo lawng chuan ram hming inziah lohna lawngah "advanced missile components" an man tih tarlangin, an chhuichian hnuah Iran aṭanga siam nia an hriat thu an tarlang bawk.
Heihi chiang zawkin an la chhui leh dawn a ni.US official chuan guided-missile destroyer Forrest Sherman chuan lawng te pakhat an man tih sawiin, an enchiannaah missile part hi an hmu ta tih a sawi. He lawnga chuangte hi Yemen Coast Guard-te hnenah an pe a, missile part erawh an kawl thung.
Tunhnaiah hian US indo lawngte hian Iran ralthuam an man fo a, mahse official-te chuan tunṭuma an man missile part hi chu a danglam bikin a changkang zawk tih an sawi. United Nations resolution siam hnuaiah Iran hi hrek niin, an ram pawna ralthuam pek emaw hralh emaw chu UN Security Council pawmpuina tel lo chuan phal a ni lo a, Houthi hruaitute hnena ralthuam pek a phal lo bawk.
Heti chung hian Iran hian Houthi-te hnenah hian ralthuam a pe ru reng tho nia hriat a ni a, tunhnaia an ralthuam mansakte pawh hi Houthi helte tana an pek tur a nih an ring. Iran leh US inkar boruak hi a ṭhe hleithei lo a, May thla aṭang khan Pentagon chuan Iran-ah hian sipai 14,000 vel a dahlut tawh a ni.