Khawvel

LTTE General hlui man

Sri Lanka helpawl, LTTE general hlui Karuna Amman chu nimin khan man a ni.

Karuna hian an rama tualchhung indona a tawp dawn lam, kum 2009 khan an pawl hi chhuahsanin President Mahinda Rajapsaka lam a zawm a ni. Sorkar sipaite laka LTTE an tlawm hnuah, Karuna hi minister-ah dah zui a ni. Minister a nih laia sorkar motor a dawn chu Karwuna hian tun thlengin a la pe kir lo a, insawifiah tura hriattirna pawh pek a ni tawh. Mahse hun pek chhunga engmah a sawi loh avangin nimin khan man a ni ta a ni.

Trump-a’n Pakistan PM a fak

Pakistan Prime Miniser Nawaz Sharif-a chuan US President-elect Donald Trump chu Nilaini zan khan biain lawmpuina a hlan a, Trump chuan Sharif-a chu mi ṭha tak a nih tih alo hrilh.

Hruaitu pahnihte hian thil pawimawh hrang hrang an sawidun a, Trump chuan Pakistan-in harsatna a tawh mekte chinfel dan zawnpui a inhuam thu a sawi. Sharif-a hnena hian mi ṭha tak a nih thu leh, kawng hrang hrangah hna ṭha tak a thawh thu Trump chuan hrilhin, inhmuh thuai a nghakhlel hle tih a sawi. Pakistan chu ram ropui tak, a mi chengte pawh mi fing tak takte an ni, a tibawk.

Nawrh huaihawtten Australia parliament inkhawm tibuai

Australia Parliament rorel inkhawm chu pawn lam aṭangin nawrh huaihawt≠ten refugee camp khar tura phutin an tibuai a, an rama inhumhimna dila lutte enkawlna ṭha zawk pe turin an phut.

Nawrh huaihawtte hian building kawtah banner lian tak tarin, refugee camp khar tur leh, refugee te chu rorelna dik tak pe tura an phut thu an tarlang. Mi 20 vel chu House-a public area-ah kalkhawmin an rama refugee lutte awmna ṭha pe turin sorkar an phut tih an sawi. Inkhawm auhbuai a nih vang hian Speaker Tony Smith chuan minute 90 chhung zawhna leh chhanna hun neih tura tih chu minute 40-ah a titawp a ni.