UNSC-in NKorea hrekna na zawk siam

United Nations Security Council chuan North Korea-in September thla a, a ṭum nga-na atana nuclear test a neih leh avangin na zawka an ram hrekna tur a siam thar.

UNSC member 15-te chuan NKorea-in ramdanga a thawnchhuah lian ber coal chu, a thawnchhuah theih zat kum khatah 60% a tihhniamna tur resolution a siam a, he hrekna siam hnuaiah hian kum khatah coal a thawnchhuah theih zat chu metric ton maktaduai 7.5 emaw, dollar maktaduai 400.0 chinah emaw a bithliah sak. Hei bakah hian copper, nickel, silver leh zinc-te a hralh≠chhuah a khapsak bawk.

NKorea hi nuclear leh ballistic missile a enchhin avangin kum 2006 aṭang khan UN chuan hrekna a lo siam tawh a ni.

UN Secretary General Ban Ki-moon chuan hrekna siam chu ṭha taka kenkawh a nih chauhin a hlawhtling thei a ni tih a sawi a, UN member ramte chu NKorea hrekna siam a taka lekkawh turin a chah bawk.

NKorea aṭanga coal leitu ram awm chhun, China chuan hrekna thar siam hnuaiah hian a coal lakluh zat hi dollar maktaduai 700 velin a titlem tawh dawn a ni. Kumin October thla thleng khan China hian NKorea aṭang hian coal ton maktaduai 18.6 a la lut a, hi nikuma a lakluh aiin 13% in a sang zawk a ni.