OPEC-in oil siam chhuah titlem dawn

Organization of the Petroleum Exporting Countries (OPEC) chuan oil an siamchhuah ṭhin chu ni khatah barrel maktaduai 1.2

a tihtlem a rel a, hei vang hian ni khata an oil siamchhuah chu barrel maktaduai 32.5-ah a tlahniam dawn a ni.

Oil siam titlem tura an rel hi nakkum January 1 aṭangin kalpui ṭan a ni ang. OPEC hian hei hi kum 2008 hnu lama oil siamchhuah an titlem ṭum khatna tur a ni. OPEC member ni lo, Russia pawhin an thurel hi thlawpin, anni pawhin an oil siamchhuah hi ni khatah barrel nuai thuma tihtlem a tiam.

Qatar energy minsiter, OPEC president Mohammed Al-Sada chuan an thurel chu Indonesia tih loh member dangte chuan an remti vek tih a sawi.

OPEC data-in a tarlan danin, oil siamchhuaktu lian ber Saudi Arabia chuan ni khata oil a siam chu barrel 486,000 in a titlem dawn tih a sawi. Firfiakte nena inbei mek, Iraq chuan telh ve lo turin ngen mah se, ni khata a siamchhuah zat chu barrel 210,00-a a tihtlem a ngai dawn tho a ni.

OPEC member 14 ramten crude oil an siamchhuah hi October khan ni khatah barrel maktaduai 33.83 a tling. Member ramte oil siamchhuah khawvel puma siamchhuah hmun thuma ṭhena hmun khat a tling pha niin International Energy Agency (IEA) chuan a tarlang.