Colombia-in thlawhtheihna chetsual dan chhui

Colombia thuneitute chuan Thawhṭanni zana Brazil football team, Chapecoense-te chuanna thlawhtheihna chetsual dan an chhui mek.

Mi 77 chuanna thlawh≠theihna hi Medillin-a a ṭum hmain a tla a, mi 71 an thi. Thlawhtheihna tlaa thi ruangte hi enfiah mek an ni a, forensic expert-te chuan thlawhtheihna hi a tlak hnuah, puak leh kang a awm zui loh avangin ruang enfiah hna pawh an thawk chak thei niin an sawi.

Colombia aviation agency chuan British Aerospace 146 tlaa cockpit voice recorder leh flight data recorder chu an hmu tawh a, expert-teín an zirchiang mek tih a sawi. Official-te chuan thlawhtheihna tlaa dam khawchhuak zinga mi pakhatin, Medellin khaw pawn Jose Maria Cordova airport-a an ṭum hmain thlawhtheihna fuel a zo nia a sawi chu an zirchian tur thu leh, he thu sawitu pawh hi kawmchian an tum thu an sawi. Aviation chief Alfredo Bocanegra chuan thlawhtheihna tlakna hmunah hian fuel bua pawh a awm lo niin a sawi.

Aviation official Freddy Bonilla chuan, tihdan pangngaiah chuan aircraft hian airport danga ṭum thut a ngaih palh pawhin minute 30 daih tur fuel reserve a nei tur a ni a ti a, mahse Brazil team chuanna thlawhtheihna tla hian a tlak lai hian airport dang panna tur fuel a neih tawh lo a ni, a ti.

An tlak hmaa pilot thu sawi, tape aṭanga an hriatah chuan electric failure leh fuel a awm loh thu a sawi pawh hriat theih a ni a, feet 9,000-a sanga an thlawh mek thu a sawi bawk.

Thlawhtheihna tlaah hian Chapecoense player 19 leh journalist 21 an thi tel a ni.