SKorea-a rorellai party-in President bang turin duh

South Korea-a rorellai, Saenuri Party chuan sawisel tawk mek, an ram President Park Geun-hye-i chu nakkum April thlaah president a nihna aṭanga bang turin an nawr.

Park-i hian sorkar inrelbawlna leh policy siamnaah nihna pawimawh nei lo, a ṭhianṭha Choi Soon Sil-i a inrawlh tir avang leh, firm lian-te hnenah Choi-i hlawkna tura a foundation enkawl tana sum tam tak thawhah puh a nih avangin a hmingchhe hle a, eptuten bang turin an nawr mek a ni.

Saenuri Party parliament member 128-te chuan nakkum April thla≠ah President Park-i chu bang tur leh, June thlaah president thlanna buatsaih tura an duh thu an sawi. Hei hi President thlan hun tura ruat lawk aiin thla rukin a hma zawk dawn a ni.

Parliamentary floor leader Chung Jin-Suk chuan member-te chuan an thu rel hi lungrual takin an pawmtlang tih a sawi. Party hruaitu Choo Mi-Ae chuan South Korea mipuite chuan Park-i chu bang thuai tura an duh thu a sawi.

Hetihlai hian President Park-i chuan a chung≠thu chhui chiang tur hian Nilaini khan special prosecutor a ruat. Special prosecurtor atana ruat hi senior prosecutor hlui Park Young-soo a ni a, ani hian team siamin ni 70 chhungin president puhnate hi an chhui dawn a ni. A ṭul dan a zirin ni 30 hun pek belh theih an ni bawk ang.