Burqa duh lohna lantirtu Australia senator hrem

Australia senator Pauline Hanson chuan Muslim hmeichhiate an hmai leh taksa an khuhna, burqa inbel khap tura a nawrna atan Thawhṭanni khan Parliament-ah burqa a inbel a, hei vang hian nimin khan kumin chhung atan Parliament aṭangin suspend a ni.

Hanson hi Queensland senator a ni a, an party One Nation hi an rama phalna nei lo pem lut dodaltu langsar tak an ni. Pawn chhuahnaah burqa inbel duh khap phut hian hun rei tak a lo campaign tawh. Thawhṭanni khan Parliament-ah burqa khapna bill put luh a tum chu dan sak a ni a, hemi hnu hian burqa dum nena inthuamin Parliament-ah hian a inlan zui.

Senator dangte chuan Hanson chetdan chu inthliarna rawng kai niin an puh. Senate-ah nimin khan a chetdan demna motion pu lutin, motion thlawp lamah vote 55 a tla a, a thlawp lo lamah vote nga a tla thung. Motion-ah hian Hanson chetdan chu sakhaw deusawhna leh, Muslim Australian-te zah lohna lian tak a ni, tiin an tarlang.

Hetih lai hian Hanson chuan Parliament-a burqa ha tawh lo tura an duh a nih chuan, khap a ni tur a ni, a ti ve thung. Kum 2017 khan Parliament-ah burqa hi a lo ha tawk bawk a, an ram puma burqa khap a phut thu a sawi.