Nigeria-a zirlai hmeichhia rukbo 24 te chhuah

Nigeria rama Government Girls Comprehensive Senior Secondary School (GGCSS) zirlai hmeichhia 24 ruk bote chu kar khat hnuah chhuah an ni tih nimin khan president Bola Tinubu chuan a sawi. Chhuah an nih dan erawh a sawilang lo.

Kebbi state-a GGCSS hi November 17 khan silai kengten luhchilhin, staff pakhat an that a, zirlai hmeichhia 25 an ru chhuak a, mahse, an zinga pakhat chu a tlanchhuak a ni. Zirlai rukbote chhan chhuah an nih theihna atan security force-te chuan hma an la nghal a, kar khat hnuah chhuah an ni thei ta a ni.

Nigeria ramah hian zirlai rukbo hi a thleng fo a, rubotute hian tlanchhuahna atan sum an phut ṭhin. GGCSS zirlai naupangte chhuah an nih theihna atan sorkar hian sum a pek leh pek loh a sawi chiang lo a, President chuan security force-te hmalakna a fak thu chauh a sawi.

Kum 2014 aṭang khan Nigeria ramah hian zirlai 1,500 chuang ruk bo an lo ni tawh. Kar liam ta Zirtawpni pawh khan Nigeria state-a Catholic boarding school, St Mary's School aṭangin thawktu leh zirlai 300 vel ruk bo an ni. Christian Association of Nigeria chuan an zinga 50 vel chu an tlanchhuak thei a, mi dang 250 te chu an chin hriat a la ni lo tih an tarlang.