Brazil SC-in Bolsonaro jail-a dah turin thupek tichhuak

Brazil Supreme Court chuan an ram president hlui, kum 27 leh thla thum jail tang tura hremna pek, Jair Bolsonaro chu jail-ah dah turin thupek a tichhuak. A hremna pek hi appeal theih a ni tawh lo tih a sawi bawk.

Bolsonaro hi kum 2022 inthlana a chak loh hnuah, president thar Luiz Inácio Lula da Silva kaihhruai sorkar paihthlak tuma puhin thubuai siamsak a ni a, thiam loh chan tirin kum 27 leh thla thum tang tura hrem a ni. Mahse, hremna tihchhuah a nih hnuah, August thla aṭang khan jail-a dah loin a inah pawn chhuak thei loin, house arrest-a hren a ni. A kal velna hriat theihna tur ankle monitor vuah sak a ni bawk. Kar liam ta khan a ankle monitor hi tihchhiat a tum a, hei vang hian Inrinni khan police-ten an kutah lain, tlanchhuah a tum nia puh a ni.

Pathianni khan Bolsonaro chuan ankle monitor chu soldering iron hmanga tihchhiat a tum thu hi a sawi. Tlanchhuah tumna a nei lo tih a sawi thung a, a damdawi ei vanga puhin, a ngaihtuahna fim tawk loh vanga hetianga ti hi a nih thu a sawi.