Belasur President-in Myanmar tlawh

Belarus president Alexander Lukashenko chu ni hnih cham turin Ningani khan Myanmar-ah a zin. Kum 1999-a Belarus leh Myanmar ramin inpalai tawnna tura thawh dunna an siam hnua Lukashenko-a'n Myanmar a tlawhna hmasa ber a ni.

Lukashenko leh Myanmar sipai hotu, Min Aung Hlaing te chuan ram pahnihte thawh dunna huang zauh leh thuam chak dan turte an sawi dun dawn a; griculture, food security industry leh pharmaceutical lama thawh dunna tihhmasawn dante an ngaihtuah ang.

Ram pahnih official-te chuan kumin March leh June thlaa high-level talk an neihnaa inremna an siamte kalpui a nih dan leh, hmasawn dante an thlir ho dawn bawk. Inremna eng emaw zat ziah hman an tum a, heng zingah hian 2026-28 chhunga thawhdunna tur ruangam an siamte pawh a tel.

Myanmar sipaiten kum 2021-a an rama civil sorkar thuneihna an hnehchhuh hnuah ram tam tak chuan Myanmar ram nena an inzawmna titawpin, hreknate an siam zui bawk. Hetiang karah hian Belarus hi Russia nena Myanmar sipai thlawptu ram tlemte zingah an tel. Sipai hotu Min Aung Hlaing hian kuminah Belarus ram hi vawi hnih a lo tlawh tawh a, Lukashenko nen hian China leh Russia-ah an lo inhmu fo tawh bawk. Myanmar ram inthlanpui neih tura inbuatsaihna kawng khat atan, Myanmar Union Election Commission (UEC) chu Belarus voting system zirchiang turin an lo zin tawh bawk a ni.