Imran Khan hmuhtir turin sorkar an phut

Pakistan prime minister hlui, Rawalpindi jail-a tang mek Imran Khan chu a hriselna dinhmun a ṭha lo hle nia sawi a nih hnuah, a party Tehreek-e-Insaf (PTI) chuan Khan hi hmuh tir turin sorkar an phut. Thuneitute chuan Khan hi kar thum chhung a chhungte leh a ukil-ten an hmuh an lo phalsak tawh lo a ni.

PTI thupuangtu, Zulfikar Bukhari chuan November 4 aṭang khan tuma hmuh phalsak a ni tawh lo tih sawiin, a chhan hi thuneitute lamin engmah an sawi lo a ni, a ti. Prime Miniter hlui a ni chungin a chhungte tlawh pawh an phal lo a, damdawi lam enkawlna pawh pek a ni lo, tiin a sawi. "A hriselna dinhmun kan ngaihtuah hle a, dan loa khung hran tlat a nih kan hlauthawng a ni," a ti a, sorkar hnenah a chhungten an hmuh phalsak turin a phut.