Finland-in Pakistan, Afghanistan leh Myanmar-a embassy khar dawn

Finland sorkar chuan kum 2026-ah Pakistan, Afghanistan leh Myanmar rama a embassy-te chu a khar dawn tih a puang.

Ministry for Foreign Affairs-in hemi chungchanga thuchhuah a siamah, ram pathumte ram chhung dinhmun leh, Finland nena commercial leh economy lama an inzawmna tih danglam avangin, embassy te khar a ni dawn tih a sawi. Embassy kharna tur hi buaipui ṭan a ni tih a sawi bawk.

Foreign minister Elina Valtonen chuan ram pawn lama an mission network siamṭhat hna kalpuina peng pakhat a ni tih a sawi. Hetih lai hian US lamah chuan inkhuar thar a tum zawk a, Houston-ah Consulate General an hawng a, a hmaa office an lo neih tawhnaahte commercial office hawn a ni dawn tih a sawi. Finland tana ram pawimawhahte insawrbing chhoh an tum zawk tih a tarlang.

Tun hnaiah Pakistan sorkar leh Afghanistan-a Taliban sorkar inkar boruak a ṭha lo hle a, kar liam ta pawh khan Pakistan chuan Aghanistan khawchhak lamah airstrike neiin civil mi10 an thi a ni. Pakistan chuan Afghans Taliban chu Pakistan rama pawikhawihna thlen fo ṭhin firfiak pawl thlawpah a puh a, hei hi Taliban lam chuan an pha thung. An ram bei hmasaah Pakistan an puh let a ni.

Finland hian kum 2012 khan Pakistan-a a mission te a lo titawp tawh a, mahse, kum 2022 khan a hawng thar leh a ni. Security lam dinhmun venthawn avangin kum 2023 khan Islamabad-a embassy pawh a lo khar lailawk tawh bawk.