Gaza-a Israel beihpui thlaknaah mi 70,000 chuang an thi : Hamas Health Ministry

Hamas rorelna, Gaza Strip-a health ministry chuan kum 2023 October thla aṭanga Israel sipaiten beihpui an thlaknaah Palestinian 70,000 chuang an thi tawh niin a sawi. October 10 aṭanga Israel leh Hamas-in inkahhai an puan hnuah pawh Israel-in Gaza hmun ṭhenkhat a beihna avangin thi an la awm belh zel niin a tarlang.

Hamas chuan Israel Defence Forces (IDF) ten drone hmanga an beihnaah Inrinni liam ta khan mipa naupang pahnih an thi tih an sawi. Hei bakah hemi ni vek hian Israel sipaite chuan khawmual, tuipui leh boruak aṭangin Gaza hmun eng emaw zat an bei niin an sawi.

Gaza Ministry of Health (MoH) in indona avanga thi zat a tarlan hi United Nations leh international institution-te chuan a rintlakah an ngai ṭhin. Mahse, Israel lam chuan Gaza thuneitute data tihchhuah hi a dik tawk lo tiin an sawi fo a ni.

MoH chuan thi zat hi 70,100 vel niin a sawi a, October 10-a inkahhai puan hnua Israel sipaite kuta thi hi mi 354 an tling tawh bawk a ni, a ti. Hliam tuar mi 170,900 an awm tawh niin a tarlang bawk.

Hamas firfiakten kum 2023, October 7-a Israel chhim lam bei a, mi 1,221 an that leh mi dang 251 an rukbo avangin, Israel hian Hamas rorelna, Gaza Strip-ah beihpui a thlak zui ve nghal a ni.