Malaysia-in Covid state of emergency puang

Malaysia lal, Al-Sultan Abdullah chuan an rama Covid-19 hripui leng mek darh tur venna atan ram pumah  state of emergency a puang. 

King Abdullah hian prime minister Muhyiddin Yassin thurawn angin emergency hi a puang a, ram chhunga hri lengin ziaawm lam a pan loh chuan August 1 thlengin hman chhunzawm a nih theih thu a sawi bawk. 

Hetih lai hian eptu lam chuan PM hian a kaihhruai sorkar a ngheh tawh loh avangin thuneihna chelh chhunzawm a nih theihna atan emergency puan hi a rawt niin an sawi thung. Ṭangrual sorkar a siampuite chuan PM kaihhruai sorkar an thlawpna hi hnuhdawhah an vau fo a ni. 

Emergency hnuaiah hian prime minister leh a cabinet-te chu thuneihna sang tak pek an ni a, Parliament pawmpuina lak kher ngai loin dan pawh an siam thei dawn a ni. Hei bakah hian hemi hun chhung hian ram danpui chaun Parliament tihtawp lailawk a phalsak bawk a, hei hian Muhyiddin Yassin kaihhruai ṭangrual sorkar harsatna awm pawh a tihtawp phah theih rin a ni bawk. 

Japan prime minister Yoshihide Suga pawhin nimina ruling party executive meeting-ah an rama hripui leng chu a la darh chhunzawm zel avangin khawthlang lam, Osaka, Kyoto leh Hyogo bialah state of emergency puan belh a tum tih a sawi. 

PM Suga hian kar liam ta khan Tokyo leh an ram khawchhak lam bial pathuma  thla khat chhung atana emergency a lo puan tawh chu a titawp a, mahse khawthlang lamah hri hi a darh chhoh zel avangin hengah hian emergency puan a ngaih thu hi a sawi leh a ni.