Trump-a'n Washington DC-ah emergency a puang

US President thar atana Joe Biden lakluh a nih hmain Washing­ton DC-ah buaina a chhuah leh a hlauh­thawnawm hle nia dan kengkawhtu lamin an sawi hnuah, President Donald Trump chuan US capital-ah state of emegency puan a remti a, nimin vek khan emergency hi a puang nghal.

January 6-a President Trump thlawptu ṭhenkhatten US Capitol Building luhkhung a, buaina an chawh chhuah avang khan khawpui chhunga state of emergency puang tur hian hma lak zui a ni. 

Federal Bureau of Investigation (FBI) chuan January 20-ah President thar lakluh a nih dawn avangin, Washington DC mai ni lo state dang dangah pawh buaina chhuak thut thei a nih tih an bulletin-ah an tarlang tawh bawk. 

President Donald Trump chuan US Capitol Building luhkhung a, buaina chhuak chungchangah mawhphurtu berah 'Antifa' pawl mi leh sate a puh. Antifa hi anti-fascist sawina a ni a, he pawl member-te hian far-right group-te nen buaina an lo nei fo tawh a ni. 

Trump chuan George Floyd thah a nih avanga an ram chhung hmun hrang hranga nawrh huaihawt a nih chhoh lai khan, Antifa pawl hi 'terrorist' organisation-a puanah a lo vau tawh a ni.