UN-in 2026-ah budget USD mtd 577 in tihniam dawn

United Nations secretary-general Antonio Guterres chuan kum 2026-ah UN budget chu 15.1% in an tihniam dawn tih sawiin, thawktu zat pawh 18.8% a tihtlem tum a ni, a ti.

Guterres chuan nakkuma budget atana an ruahman chu USD tld 3.42 a ni tih sawiin, hei hi 2025 budget aiin USD mtd 577 in a tlem zawk a ni. September thla thleng khan UN member ram zinga sum la chhun luh loh tlingkhawm chu USD trillion 1.59 a tling niin a sawi bawk.

Budget tihtlem ni dawn mah se, Palestinian chhawmdawlna hna thawktu, UN agency for Palestinian refugee (UNRWA) tana sum ruahman erawh tihdanglam a ni dawn lo tih Guterres chuan a sawi. "Fund tihtlem turah UNRWA ka telh lo. Tihtlem a nih chuan Gaza-a chhawmdawl hna thawhna kawngah nghawng pawi tak a nei thei dawn a ni," a ti. “Development Account and advocacy for Africa’s development” budget pawh tihtlem a ni lo bawk a ni.

UN chuan sum lama indaih lohna hrang hrang avangin UN agency emaw hnuaiah thawktu chu 2,681 in tihtlem a tum bawk. Hetih lai hian member ram eng emaw zatin an sum thawh tur an la pek loh avangin UN post 10% vel chu hnawh khah lohin a awm mek tih secretary-general chuan a sawi.

Guterres chuan UN headquarters awmna, New York khawpuia an hmun pahnih chu kum 2027 kum tawp lamah mi dang hman tir an tum tih sawiin, hemi hmang hian kum tin USD mtd 24.5 vel an hum thei dawn niin a sawi. Kum 2017-a New York-a an office ṭhenkhat an khar avangin USD mtd 126 vel an lo hum thei tawh bawk a ni.