Trump-a'n a ngaihdam hnuah Honduras President hlui chhuah

US president Donald Trump chuan ruihhlo tawlhruk leh machine gun kawl vanga thiam loh chantir, US jail-a tang Honduras president hlui Juan Orlando Hernández a ngaidam. Thawhṭanni khan Hernández hi jail aṭangin chhuah tir nghal a ni.

Hernández hi an rama National Party member niin, kum 2014-2022 chhung president a ni. US-a cocaine tam tak tawlhluhnaa inhnamhnawiha puhin thubuai siamsak a ni a, kum 2022 April thla khan a thubuai hmachhawn turin US-ah thawn a ni. Kum 2024 March thla khan US-a cocaine tawlhluhnaa inhnamhnawih leh, machine gun kawla puhnaah thiam loh chantir a ni a, kum 45 tang tura hrem a ni. West Virginia-a USP Hazelton-a tan-in, venhimna khauh takah tan tir a ni.

New York-a a thubuai ngaihtuah lai hian prosecutor-te chuan Honduras President a nih laiin an ram chu ruihhlo siamna hmun ang maia a chantir thu leh, ruihhlo tawlhru ṭhinte lak aṭanga thamna sum tam tak la a, danin a hrem tur lakah hum ṭhinah an puh. Kum 45 tang tura hrem a nih bakah USD mtd 8 chawi tura tih a ni bawk.

President Trump chuan Hernández a ngaihdam chhan sawifiahin, thubuai siamsak a nih dan chu Joe Biden-a kaihhruai sorkarin a ruahman a ni a ti a, Honduras president a nih avangin finfiahna engmah awm loin ruihhlo zuarah an puh a ni, tiin a sawi.