Imran Khan leh a farnu inhmu

Pakistan prime minister hlui, Rawalpindi-a Adiala jail-a tang mek Imran Khan chu Thawhlehni khan a farnu, Uzma Khanum nen an inhmu thei ta. An inhmuh lai hian jail pawn lamah PTI worker tam tak an lo pungkawm bawk.

Imran Khan hi hun rei tak tumah hmuh phalsak loa hren a ni a, a chhungte ngei pawhin an hmu thei lo. Hei vang hian a hriselna a ṭha lo hle tih bakah, a thi tawh ang hialten thu a than phah a ni. Jail thuneitute erawh chuan Khan hi a hriselna a ṭha niin an sawi thung. A chhungte leh PTI worker-te chuan Islamabad High Court-in kar khat a vawi hnih tlawh phalna a pek anga tlawh phalsak an phut a, a dikna chanvo rahbehsak a nih avanga lungawi lohna lantir pawh an tum bawk. PTI in nawrh huaihawt an tum mek laiin, jail thuneitute chuan Thawhlehni kha a farnu in a tlawh hi an phalsak ta a ni.

Khanum chuan a nuṭapa chu a hrisel ṭha niin a sawi a; mahse, a rilru lam erawh an tihrehawm hle tih a sawi. Imran Khan tawrhna zawng zawng thlen chhanah sipai hotu Army Chief General Asim Munir chu mawhphurtuah a puh. Khan leh a nupui, Bushra Bibi te dik lo taka puha tantir an nihna chhan chu Munir-a thupek vek niin a sawi. A laizawn dangte nena an sawi ho hnuah, an nuṭapa dinhmun chiang zawk chu sawi chhuah a tum tih a tarlang.