Kum 2014-a Malaysia thlawhtheihna bo zawn chhunzawm leh dawn

Malaysia transport ministry chuan kum 2014-a chin hriat loha bo, Malaysia Airlines Flight MH370 chu kumin December 30 aṭangin tuipui chhungah zawn chhunzawm a ni leh dawn tih nimin khan a puang.

Flight MH370, Boeing 77-ah hian khualzin 227 leh thawktu 12 an chuang a, kum 2014 March 22-a Kuala Lumpur aṭanga Beijing pana a thlawk chu chin hriat lohin a awm zui a ni. Thlawhtheihnaa chuang tam zawk hi China mi an ni. Satellite data aṭanga a lan danin, thlawhtheihna hi a thlawhna tur pangngai aṭanga pengin Indian Ocean chhim lam a pan a, chesualin tuipuiah a tla ta nia rin a ni. Hun rei tak zawn a ni a, Africa khawchhak lam tuipui kam leh Indian Ocean thliarkarahte thlawhtheihna them nia hriatte chu len chhuah ni mah se, thlawhtheihna tak hi tun thlengin hmuh a la ni lo.

Transport ministry chuan US-a marine robotics firm, Ocean Infinity-in tui chhungah zawn hna hi a thawk leh dawn tih a sawi. December 30 aṭanga thawk ṭanin, ni 55 chhung an zawng dawn a ni. Kum 2018 khan Ocean Infinity hian a lo zawng tawh a, mahse, hmuh chhuah engmah an nei lo a ni.