Kum 20 chhungin China defence budget 840% in pung

US Under Secretary of Defence for Policy, John C Rood chuan kum 20 chhungin China defence budget chu 840%-in a pun thu leh, a punna hi US dollar tluklehdingawn 20 aṭanga 170-a a san chhoh thu Senate Armed Services Committee-ah a tarlang. 

China hi khawvela sipai nei tam ber ramte zinga mi a ni a, South China Sea-ah leh Africa-ahte an sipai lalram hi an zauh zel a ni. China sipaite hi  Chinese People's Liberation Army (PLA) tih an ni a, Ground Force, Navy, Air Force, Rocket Force leh Strategic Support Force-te infinkhawm an ni. 

Vansang lamah te, tuihnuai indo lamahte, cyber, electronic warfare-te, thlawhtheihna chungchangah te, bomb lamah te leh long-range cruise missiles-ah te hian China chuan ralthuam an neih ṭhat theih nan ṭan a lak nasat thu  Senate Armed Services Committee-ah hian tarlan a ni bawk. 

China chuan cyber lamah a sipaite a thuam chak nasat bakah, khawmual sipaiah hian mi mak­taduai khat chuang an awm a, indo thlawhtheihna 2,600 zet a nei bawk tih  Rood chuan a sawi. Rocket Forces hian Intercon­tinental Ballistic Missiles 90 vel an nei a, chung zinga ṭhenkhatte chu road-mobile delivery system hmang an ni bawk. Nuclear lamah ralthuam pawh a nei ṭha hle nia sawi a ni. 

China-in sipai lama sum leh pai a senso a pun chhoh laiin, US president kalchhuak ta Barack Obama kaihhruai sorkarah khan US-in sipai lama a sumsen chu 25%-a a tlak hniam thu Rood chuan a tarlang. "Russia leh China kan el dawn a nih chuan US hian defence lamah tunai hian pawisa kan sen tam a ngai a, kan sipaite mamawh pek leh ralthuam lama hmasawn kan duh chuan budget-ah kan dah tam a ngai a ni," tiin Senate Armed Services Committee Chairman Senator Jim Inhofe chuan a sawi.