Anti-Hamas militia hruaitu kaphlum

Gaza-a Palestinian militia hruaitu leh Hamas thlawp lotu, Yasser Abu Shabab chu kahhlum a ni. Abu Shabab hi Popular Forces group kaihruaitu a ni a, he pawl hian fighter tam tak neiin, khawthlang lam khawpui Rafah bula Israel thununna bialah hna an thawk a ni.

Popular Forces chuan thuchhuah siamin, Abu Shabab hi Abu Seneima chhungkaw member inkara buaina chhuak chinfel a tum laiin kahhlum a nih thu an sawi. Israel nen thawhhona an neih avangin Hamas-in an that tih report chu thudik lo a ni tih an sawi bawk. Hemi hma hian Abu Shabab-a Bedouin hnam Tarabin-te thuchhuah chuan, amah hawtuten an that tih tarlangin, Palestinian mipui phatsantuah an puh bawk.

Hamas thuchhuah chuan Abu Shabab chu mipui leh ram phatsantu, leh Israel thlawptu niin a tarlang a, a thihnaah hian an inhnamhnawih lo tih an sawi. Israel Army Radio chuan security thuchhuah tarlangin, Abu Shabab hi Israel khawthlang lam khawpui, Beersheba-a Soroka hospital-a dah a nih hnuah a hliam tuar loin a thi tih an sawi. Mahse damdawi-in chuan Abu Shabab hi an enkawlna hnuaia thi a ni lo tih an sawi ve thung.

Popular Forces chuan thuchhuah siamin, Abu Shabab-a hma lo lak tawhna chu chhunzawm zel a ni dawn tih sawiin, Gaza-a firfiak pawl tihbo a nih hma leh mipui, remna leh muanna duhtute tan hmalam hun êng leh him tak siam a nih hma loh chuan beihpui an thlak zel dawn tih an sawi.