Hong Kong-ah LegCo inthlanna neih a ni

China-a special administrative region Hong Kong-a rorelna, Legislative Council (LegCo) inthlanna chu nimin Pathianni khan neih a ni. Kum 2021-a electoral system thlak a nih hnuah inthlan neih vawi hnihna a ni a, dan tharah hian ram hmangaihtu tak tak 'patriots' tan chauh inthlan chuh theih tura duan a ni.

LegCo rorelna hi mini parliament anga hman a ni a, dan leh dun pawh siam theih a ni; seat 90 awmin, tun inthlanah khan candidate 161-in an chuh a ni. Kumin inthlanah hian mi thar eng emaw zatin inthlan an chuh a, heihi law maker awmsa a zatve aia tam an ban vang niin report chuan a tarlang. Local media chuan law maker eng emaw zat bang chu Beijing lam aṭanga nawrna awm vang leh kum upa tawh tam tak an awm vang niin an tarlang bawk.

Inthlanna buatsaih hi thlahmasaa Wang Fuk Court, Tai Po district-a kangmei a chhuah hnuah neih niin, mipui tam takin chhiatna thleng vang hian sorkar an sawisel nasa hle chungin inthlan hi kaltlangpui a ni ta tho a ni. Inthlan buatsaihin a tum ber chu mipui vote thlak tam leh tam loh enchhin niin, kum 2021 vote thlakah khan vote 30% chauh a tla a; sorkar pawhin vote thlak tura sawmna an siam nasa hle bawk.

Wang Fuk Court, Tai Po district-a kangmei chhuak chu mipui tam zawk chuan sorkar inrelbawlna fel loh vang niin an puh a, chhiatna thleng vang khan mi 159 an thih phah bawk. Chhiatna a thlen hnu hian inthlan campaign pawh tih tawp a ni zui a, mahse debate neih erawh a hnuah kalpui chhunzawm leh a ni thung. Sorkar chuan inthlan tiṭhuanawm zawnga che an hriat eng emaw zat an man zui bawk a ni.