Nigeria school naupang rukbo 100 chhuah

Nigeria school naupang rukbo zinga 100 te chu nimin khan chhuah niin, Niger state-a official-te kutah hlan an ni tih United Nations chuan a sawi.

Nimina naupang chhuahte hi November thlaa Catholic school aṭanga rukbote an ni. Rukbo zinga zirlai leh staff 165 dangte chu an chin hriat a la ni lo.

November thla khan Niger state-a St. Mary's co-educational boarding school aṭangin zirlai leh staff 315 ruk bo an ni a, an zinga 50 vel chu a hnuah an tlanchhuak thei a ni. Rukbote chhuah an nih theihna atan hian thuneitute chuan hma an la a, an zinga 100 chhuah an ni ta a ni.

Nigeria ramah hian school naupang, a bikin hmeichhe naupang rukbona a thleng fo a, a rutute hian tlan chhuahna atan sum an phut ṭhin. Kum 2024 July leh 2025 June inkar khan mi rubotuten sum an phut pek hi USD mtd 1.66 a tling hman niin Lagos-a consultancy, SBM Intelligence report chuan a tarlang.