Netanyahu-a'n Gaza chungchang Trump sawipui dawn

Israel prime minister Benjamin Netanyahu chuan US-in Gaza Strip-a indona tihtawpna tura ruahmanna a siam chungchang chu tun thla tawp lam hian US president, Donald Trump a sawipui dawn tih a sawi. Hemi rual hian thil chinfel tur tam tak a awm tih a sawi nghal bawk.

Pathiannia an ram tlawhtu, Germany Chancellor Friedrich Merz nena Jerusalem-a chanchinthar lakhawmtute an kawmnaah, Netanyahu chuan US President nen chuan thil pawimawh sawi tur tam tak an nei tih a sawi a, Gaza Strip-a inkahhai thawh hnihna kalpui a nih theih dan turte pawh a sawi a ngai tih a tarlang. Gaza-a Hamas rorelna tihtawp dan tur pawh sawipui a tum tih a tarlang bawk.

Trump ruahmanna hnuaia Gaza Strip-a inkahhai puan mekah, Israel hian Gaza-a hmun 53% chu a la thunun a ni. Inremna an siam angin Hamas-te mi man, Gaza-a an hren nungdama awmte chu chhuah kim an ni tawh a, ruang hlan tur pawh pakhat tih loh chu an hlan kim tawh a ni.

Chancellor Merz chuan Gaza din thar lehna tura Germany chuan puih a inhuam tih a sawi. Mahse, Netanyahu leh Trump-te inhmuh hun nghah a, US-in eng ang ruahmanna nge a siam tihte chu thutlukna an siam hmain an ngaichangg phawt dawn tih a sawi. Hemi rual hian inkahhai thawh hnihna chu neih ngei a ṭul thu a sawi bawk.