Brazil Parliament-in Bolsonaro jail tan hun tihtawina tur bill pawm

Brazil Parliament lower house, Chamber of Deputies chuan an ram president hlui, Jair Bolsonaro jail tan hun tihtawi a nih theihna tur bill chu Nilaini khan an pawm. He bill hi upper house, Senate in a pawm ve leh a nih chuan Bolsonaro tan hun hi kum hnih chuangin a tawi theih phah dawn a ni.

Kum 70 mi, Bolsonaro hi kum 2022 inthlana a chak loh hnuah, president atana thlan tlin Luiz Inacio Lula da Silva kaihhruai sorkar thar paihthlak tuma phiarruah puh niin, kum 27 tang tura hrem a ni. Brasilia-a Federal Police Superintendency-ah a tang mek a ni. Thawhlehni khan inzai a ngaih avangin jail aṭanga chhuah an dil a, jail-ah dah loin a chenna ina 'house arrest' a dah an dil a ni.

House bill an pawm hi pawikhawihna hrang hranga thiam loh chantirte hremna tihtawina tur a ni a, heng zingah sorkar paihthlak tuma puha thiam loh chantirte pawh a huam a ni. Sawi honaah house member-te pawh an inhnial nasa hle a, member pakhat phei chu police-ten an hruai chhuak a ni. TV-a pek chhuah pawh titawpin, journalist-te pawh plenary hall aṭangin chhuah tir an ni bawk.

Bill hi Senate-in a pawm a, 'law' a chantir a nih chuan Bolsonaro bakah amah thlawptu an man, mi 100 te pawh ngaihdam an ni thei ang.