Zelenskyy-a'n inthlan an inpeih tih a sawi

Ukraine president Volodymyr Zelenskyy chuan US leh an thawhpui ram dangten an ram himna tura an puih theih dawn chuan, thla thum chhunga inthlan buatsaih turin an kaihhruai sorkar chu a inpeih theih tur thu a sawi.

Zelenskyy chuan US president Donald Trump-a'n Russia nena an indona chu inthlan buatsaih theih loh chhuanlamah a hmang nia a puh chungchang a sawinaah he thu hi a sawi a ni. A president term hi nikum khan a zo tawh a; mahse, Ukraine danah indo laia inthlan buatsaih khap a nih avangin tun thlengin inthlan hi buatsaih a la ni lo. Hetih laia inthlan buatsaih duh lo anga an puhna chu chhangin, Zelenskyy chuan,'Inthlan nei turin ka inpeih reng a ni. US leh European ram dangte boruak him tak hnuaia inthlan neih a nih theihna tura min pui a nih chuan, ni 60-90 chhungin inthlan nei turin kan inpeih nghal ang," a ti.

Dik lo taka thuneihna a chelh zui reng nia puhna chu chhangin, Zelenskyy chuan Parliament-ah martial law puan laia inthlan neih a nih theihna tur dan thar siam tura ngen a tum thu a sawi bawk.

Russia-in an ram a run mek laia inthlan buatsaih chu thil tihchi a nih loh thu Zelenskyy leh official dangte pawhin an l o sawi fo a ni. Indonaah an sipai tam tak an tel a, hei bakah Russia-in an ram a luahsakah mi tam tak an cheng bawk. Ram mipui ngaihdan an lakah pawh indo laia inthlan buatsaih chu duh lotu an tam zawk bawk a ni.