Thailand Parliament ṭhiat, nakkum kumtir lamah inthlang dawn

Thailand prime minister Anutin Charnvirakul chuan nakkum kumtir lama Parliament inthlan buatsaih a nih theihna atan nimin khan Parliament a ṭhiat.

Conservative Bhumjathai party hruaitu, Anutin Charnvirakul hi September thlaa PM aṭanga Paetongtarn Shinawatra paihthlak a nih hnuah PM thar atan dah a ni a, thla thum chauh hruaitu dinhmun hi a chelh hman a ni. Mahse, inthlan neih hma chu caretaker government a la kaihruai chhunzawm ang. Anutin hi August, 2023 hnuah Thailand prime minister pathumna a ni.

Parliament ṭhiah a nih ṭanga ni 45-60 chhungin House of Representative inthlan hi buatsaih tur a ni a, hei vang hian nakkum January thla tawp lam emaw February thla tir lamah emaw inthlan hi buatsaih a ngai dawn a ni. Anutin chuan an ram mipui rawngbawl sak tura thuneihna an chelh chhunzawm leh theih ngei a beisei thu a sawi.

Inthlang tura an inbuatsaih chhoh a ngaih laiin, Thailand hi Cambodia nena ramri chungchanga buaina an neih avangin an la buai reng a ni. Tun kar chhung pawhin ram pahnih sipaite inbeihna avangin mi 20 chuang an thi a, mi sing tel chu hmun him lamah an tlanchhe bawk. Anutin pawh hi buaina an neih mek avangin Krismas zawh lamah Parliament a ṭhiat dawn nia ngaih a ni a, mahse rinlawk dan aiin a ṭhiat hma ta zawk a ni.

Nimin khan ram pahnih sipaite chu a ni ngana atan an la inkap chhunzawm. Thailand spaiten ramri bula Cambodia province pathum chu zing karah an bei leh niin Cambodia lam chuan a tarlang. Thi leh hliam an awm leh awm loh erawh an sawilang lo. Hetih lai hian Thailand caretaker PM Anutin chuan US president Donald Trump nen an inbe dawn tih a sawi. Trump hian Nilaini khan Thailand leh Cambodia ram hruaitute chu an inbeih mekna titawp tura nawr turin biak a tum tih a lo sawi tawh a ni. July thlaa ram pahnihte inbeih ṭum pawh khan Trump hmalakna hnuaiah inkahhai an puang a, inremna thuthlung an ziahnaah pawh a telpui a ni.