Bangladesh PM hlui Khaleda Zia dinhmun a ṭha lo

Bangladesh prime minister hlui Khaleda Zia chu a dinhmun a ṭha lo hle a, ventilator hman tir a ni tih a enkawltu doctor-ten an sawi.

Medical board hotu, cardiologist Shahabuddin Talukdar chuan Zia hian thawk lamah harsatna a nei a, a oxygen level a hniam laiin carbon dioxide level a sang niin a sawi. A hmain “High Nasal Cannula [HFNC] leh BiPAP [Bilevel Positive Airway Pressure] support hmanga enkawl ni mah se hma a sawn thei lo a, ventilator hman tir a ni tih a tarlang.

Kum 80 mi, Bangladesh Nationalist Party (BNP) chairperson Zia hi a taksa lama harsatna chi hrang hrang a neih avangin November 23, 2025 aṭang khan Dhaka-a Evercare Hospital-ah enkawl a ni. A kal (kidney) a ṭha tawh lo a, dialysis tih tir reng a ni bawk.

Kar liam ta khan medical board chuan London lama inenkawl tura a kal chhuah an phalsak a, mahse a phurtu Qatar-in air ambulance a thawn chu Dhaka a thleng thei lo. Hemi hnu hian thlawh chhuah pui tura a taksa a chak tawk hma chu Evercare Hospital-a enkawl phawt tura tih a ni leh ta zawk a ni.