UK-a Bristol Museum aṭangin thil hlu tak tak ru chhuak

United Kingdom (UK) a Bristol Museum aṭangin hmanlai thil hlu tak tak 600 chuang ruk chhuah a nih thu UK police-te chuan an sawi.

He thil thlen hun hi September 25 daih tawh kha a ni a, mahse, puanzar a ni lo a, nimin khan police-te chuan an sawichiang chauh a ni. Museum rawktu hi mi pali niin, zing karah Cumberland Basin area-a Bristol Museum-a British Empire and Commonwealth collection an dahna hmun chu an rawk a ni. Detective-te chuan CCTV footage bakah forensic investigation hmangin rukrute hi an chhui mek.

Hun eng emaw chen puangzar loa rukrute chhui an nih hnuah, man chhuah an la nih loh avangin police-te chuan CCTV footage chu tichhuakin, rukru nia hriatte chu man chhuah an nih theihna atana pui turin mipui puihna an dil.

Museum aṭanga thil ruk chhuah zingah hian medal, badge leh pin, geological specimens, carved ivory, silverware leh mi limte an tel. India aṭanga an lak eng emaw zat a tel.