Brazil-ah Bolsonaro jail tan hun tihtawp theihna bill duh lohna lantir

Brazil Parliament-in an president hlui, kum 27 tang tura hrem mek, Jail Bolsonaro jail tan hun tihtawi theihna tur bill siam a tum chu dodalin, Pathianni kha ram chhunga khawpui hrang hrangah mipuiin duh lohna an lantir.

An ram khawpui Brasilia bakah Sao Paulo, Florianopolis, Salvador leh Recife-ahte lungawi lohna hi lantir a ni. Pungkhawmte chuan Bolsonaro ngaihdam theihna tur bill siam chu an duh lo tih sawiin, hei hi sorkar paihthlak tumte venhim tumna a ni, an ti. Brazil ramah dictator eng emaw zat an lo awm tawh a ,an ram tan an ṭha loin hetiang hi an awm leh an duh tawh lo tihte an sawi.

Bill siam tharah hian kum 2023, January 8-a Bolsonaro thlawptu, sorkar thar paihthlak tuma sorkar building-te luhkhunga beitute hremna tihnepsakna tur a tel a, he thil thlenga mawhphurtu bera puh Bolsonaro jail tan hun tihtawp theihna tur pawh telh a ni bawk. Kar liam ta Nilaini khan lower house-ah pass a ni tawh a, tun karah Senate in a ngaihtuah ve leh dawn a ni.