Chile President atan José Antonio Kast thlang

Chile president thar atan far-right wing José Antonio Kast thlan a ni a, nakkum March thlaah lak luh a ni ang.

Kast hian rorellai, left-wing ṭangrual candidate Jeanette Jara hnehin, vote tla aṭangin 58% chuang a hmu phak. Tun ṭum hi president a chuh vawi thumna a ni.

President atana thlan tlin a nih hnuah an ram khawpui, Santiago-a a thusawi hmasa berah, Kast chuan Chile ram chu pawikhawihna lak aṭanga fihlim tura siam a, mipui rilruah hlauhthawnna awm rengte tihbo a tum tih a sawi. "Pawikhawihtute chu an nun a inthlak danglam tawh ang. Kan umzui ang a, rorel sakin khung bo an ni tawh dawn a ni," a ti. Campaign au hlaah pawh an rama pawikhawihna thleng hluar zel tihbo a, dan leh thupek khauh taka kenkawh leh, dan loa pem lutte dap chhuah chungchang a hmang a, sorkar sum hman ral pawh tihtlem a tum bawk.

Kast hi US president Donald Trump ngaisangtu a ni a, a policy-ah pawh Trump policy entawn eng emaw zat a nei. Peru leh Bolivia nena an ramri hung a tiam a, tan-inahte venhimna khauh tak siam a, dan loa pem lutte thawn kir te a tiam a ni.

Chile hi South America-a ram him leh ngelnghet ber zinga mi a ni ṭhin. Mahse,kum eng emaw chen aṭang khan ram dang aṭang pem lut an pung nasa hle a, pawikhawihna pawh a thleng fo. Kast chuan pem lut tam leh pawikhawihna hluar chho hian inzawmna a nei tih a lo sawi fo ṭhin.