Trump-a'n Krismas thilpek atan US sipaite USD 1,776 pe vek dawn

US president Donald Trump chuan Nilaini zan khan an ram sipaite tan Krismas thilpek atan USD 1,776 a pe vek dawn tih a puang. He thilpek hi sipai mtd 1.45 ten Krismas hmaa an dawn vek tur thu a sawi.

Trump chuan sipaite thilpek pek tur chu chhiah lak a tihsan aṭanga sum hmuhin a tum thei vek tih a sawi a, mi dang rin phak bakin an sum hmuh a pung a, an sipaite aia thilpek pek phu hi an awm lo tih a sawi a, a lawmpui thu a tarlang nghal bawk.

Hetih lai hian America mi tam tak chu thil man sang avangin an phun thung. Trump-a'n chhiah lak a tihsan leh thawktu lak belh thar a tihtlem chhoh avangin thil man sangin ziaawm lam a la pan lo a, labour market lam pawh a tlahniam a ni. Unemployment rate hi kumin January-a 4% a nih laiin kum tawp lamah chuan 4.6% ah a kai tawh a ni. Mahse, Trump chuan an ramin harsatna a tawh mekah president hmasa, Joe Biden a puh a, "Thla 11 liam taah khan dinhmun harsa leh buarchuar tak tak ka rochun a, hei hi siamṭhat tumin ka bei mek a ni," a ti.

Thil man sangin mipui a nghawng dan pawh a hriat thu Trump chuan a sawi a, hemi rual hian a trade policy chu a ṭhat thu leh, chhiah lak dan siam thar chuan nghawng ṭha tak a neih thu a sawi. China, Canada, Mexico leh ram dang aṭanga chhiah lak tihsan chuan an rin phak bakin sum an lak luh belh phah tih a tarlang. Kum 2026-ah an ram economy a invawrh chho dawn hle tih a sawi bawk.

Damdawi man tihhniam tumin hma a la mek tih President chuan a sawi a, drug company leh ram dangte pawh inbiakna a neihpui mek thu leh, damdawi leh a kaihhnawih thilte chu 400 - 600% thlenga tihhniam theih an tum tih a tarlang. A man tihhniamna tur a thawh khatna hi kum thar January thla aṭanga kalpui tum a nih thu a sawi.