Pakistan PM hlui Imran Khan leh a nupui kum 17 tang turin hrem

Pakistan court chuan Inrinni khan an ram prime minister hlui, Imran Khan leh a nupui, Bibi te chu Tosakhana eiruk thubuaiah kum 17 ve ve tang turin a hrem.

Tosakhana case pahnihna tia sawi hi Imran Khan a prime minister laia mi niin, kum 2021-a Saudi Arabia hruaitu hnen aṭanga thilpek an dawn chungchangah thil dik lo tak tia puhna chungchang a ni. Special court judge Shahrukh Arjumand chuan Imran Khan-a tan mekna, Rawalpindi-a Adiala Jail-a court-ah thutlukna hi a puang a ni.

Imran Khan te nupa hi Pakistan Penal Code-a Section 409 hnuaiah kum 10 tang tur leh, Prevention of Corruption Act hnuaiah kum sarih ve ve tang turin an hrem a, Rs nuai 10 ve ve chawi tura tih an ni bawk.

Kum 2021-a Pakistan prime minister a nih laia Imran Khan leh a nupui, Bibi ten Saudia Arabia an tlawh ṭum khan Saudi deputy crown prince, Mohammed bin Salman chuan thilpekah tlereuh lam man to tak set a lo pe a ni. Mahse, Pakistan danah chuan sorkar official-ten thilpek an dawn hi state treasury, Toshakana department-ah pek luh vek tur a ni a, a dawngtute hian an duh chuan an thilpek dawn hi sumin an khul leh tur a ni. Khan hian private firm hnenah jewellery set man hlut zawng chu hniam takin a chhut tir a, tlawm takin an khul niin an puh.

Khan hi kum 2022 April thlaa Parliament-a rin tawk lohna vote hmanga prime minister aṭanga paihthlak a ni. Paihthlak a nih hnuah thubuai eng emaw zat siamsak a ni a, kum 2023 May thlaa amah thlawptuten tharum thawhna an thlennna kaihhnawihah pawh thubuai siamsak a ni bawk. Rawalpindi jail-ah a tang mek a, tun hnaia hun rei tak a chhungte pawh hmuh phalsak a nih loh avanga thuneitute sawiselna tam tak a awm hnuah, tun thla tir lam khan a farnu chu hun rei vak lo a hmuh an phalsak a, hemi hnu hian mi dang hmuh an phalsak leh tawh lo a ni.