Brazil President hlui Bolsonaro inzai tura a chhuah phalsak

Brazil president hlui, sorkar paihthlak tuma puh kum 27 tang tura hrem, Jair Bolsonaro chu hernia surgery nei turin a tanna aṭanga chhuah phalsak a ni tih court chuan a sawi. Mahse, a inzai hun tur hi puan a la ni lo.

Brazil Supreme Court justice Alexandre de Moraes chuan doctor lamin Bolsonaro inzai ngei a ngaih thu an sawichian hnuah, chhuah hi a phalsak a ni. President hlui, Bolsonaro hi kum 2018-a election rally a neih laia a pumah vih a nih avangin ṭum eng emaw zat zai a nih phah tawh a, hemi vang hian a taksa lamah harsatna a la tawh phah fo a ni.

De Moraes chuan President hluiin inzai zawha in lama hren, house arrest-a dah tura a ngenna erawh a hnawlsak thung.

Bolsonaro hi an ram khawpui, Brasilia-a federal police headquarters-ah room, meter 12 biala hrena ni a, private bathroom, air condition, TV leh dawhkan pek a ni a, mahse, tang dangte nena an inbiakpawh erawh phalsak a ni lo. A doctor leh lawyer-te chuan an duh hunah an hmu thei a, midang hmuh tumte erawh chuan Supreme Court aṭanga phalna an neih phawt a ngai a ni.