Ramria inbeihna vangin Cambodia mi nuai 5 chuang tlanchhe tawh

Cambodia Interior Ministry chuan Thailand sipaite nena ramria kar hnih chhung an inbeih tawhna avangin, ramri hrula cheng, Cambodia mi nuai nga chuang chu hmun him lamah an tlanchhe tawh tih a sawi.

Pathiannia thuchhuah a siamah, Ministry chuan, "Tunah hian Cambodia mi nuai nga chuang chu Thailand sipaite beihna laka himna zawngin an tlanchhiat a ngai a, an zingah naupang leh hmeichhia tam tak an tel," a ti. Thailand sipaite hian F-16 aircraft hmangin Cambodia ramri te chu an bei chhunzawm reng niin a tarlang.

Thailand lam pawhin inbeihna thleng vang hian Thailand lamah pawh mi nuai li vel an tlanchhe tawh niin a tarlang ve bawk.

Ram pahnih sipaite ramria an inbeih thar lehna avang hian Thailand lamah mi 22 leh Cambodia lamah mi 19 an thi tawh niin official-te chuan an sawi. July thlaa an inbeih hnuah inkahhai puangin inremna an ziak tawh a, mahse, tun hnaiah inbei thar lehin, he thil thlen chhanah hian an inpuh tawn a ni. Vawiin hian Cambodia leh Thailand telna, ASEAN foreign minister-te chu Kuala Lumpur-ah an inhmukhawm dawn a, ram pahnihte buaina chinfel dan an ngaihtuah ang.