Malaysia court-in PM hlui Najib ngenna hnawl

Malaysia court chuan an ram prime minister hlui, eiruk thubuaia thiam loh chantir, Najib Razak-a'n a tan hmabak la neihte house arrest-a dah tura a ngenna chu nimin khan a hnawl.

Court chuan an ram lal hluiin Razak chungchanga thuchhuah a siam chu ram danpui nena inmil lo a ni tiin a sawi. Mahse, Najib-a lawyer-te chuan appeal an tum a ni.

Kum 72 mi, Prime Minister hlui hi thuneihna a chan laia a thuneihna dik lo taka hmang a, sorkar hnuaia development company IMBD fund tichingpen a, a mimal tana sum tam tham dahah puhin thubuai siamsak a ni. He thil thleng vang hian kum 2018 khan a kaihhruai sorkar pawh paihthlak a nih phah. Kum 2020 khan a thubuaiah hian thiam loh chantirin, kum 12 tang tura hrem a ni. Hremna hi court sang zawkah a appeal a; mahse, an chak zawh loh avangin kum 2022 August thla khan jail-ah tantir niin, Malaysia PM hlui zinga jail-a tang hmasa ber a ni.

Kum 2024 April thla khan court-ah ngenna theh lutin, an lal hlui Sultan Abdullah Sultan Ahmad Shah chuan a tan hun hmabak la neihte jail-ah awm loin, a inah pawn chhuak thei loa hren, house arrest-a awm chhunzawm a phalsak tih a sawi. He ngaihnathiamna hi Sultan Abdullah kaihhruai, Pardons Board meeting-ah tihchhuah a ni tih a sawi. Pardons Board hian a tan hun, kum 12 chu nikum vek khan kum rukah a tihhniam sak a, a pawisa chawi tur pawh a titlem bawk.

Najib chuan an puhnaah hian tih dik loh a nei lo niin a sawi ve thung a,financier Low Taek Jho-a'n a bum niin a sawi. Jho hi tun thlengin man a la ni ve lo thung.