Nigeria-ah zirlai naupang leh thawktu ruk bo 130 chhuah

Nigeria rama November 21-a Niger state-a St. Mary's Catholic School aṭanga zirlai leh thawktu rukbo zinga mi 130 te chu Pathianni khan chhuah an ni.

Silai keng tu tih hriat loh ten Catholic School hi luhchilhin, zirlai leh thawktu 303 an ru bo a ni. An zinga 50 chu a hnuah an tlanchhuak a, tun thla tir lam khan naupang 100 chhuah an lo ni tawh bawk.

Niger state police thupuangtu, Wasiu Abiodun chuan thuchhuah siamin, zirlai leh thawktu ruk bo zinga ṭhenkhat chhuah an nih thu hi a sawi a, chin hriat loha la awm mi 35 te pawh chhanchhuah leh thuai beisei an nih thu a sawi bawk. Pathiannia zirlai leh zirtirtu chhuahte hi nimin khan Niger state khawpui, Minna-ah thlenpui niin an chhungte nen an inhmu leh thei a ni.

November 21-a zirlaite rukbo hi eng pawl mahin an tih a nih thu an sawi lo. Nigeria ramah hian sum phuta zirlai leh khualzinte rukbo hi a thleng fo a ni. Niger state-a inrukbo thlen hma lawk hian an ṭhenawm state, Kebbi-ah zilrai naupang 25 rukbo an lo ni tawh bawk a ni.