Israel-in West Bank-a Juda chenna hmun tur siam belh remti

Israel security cabinet chuan an ram luah, West Bank-ah Juda-te chenna tur hmun 19-a siam a remti. Finance minister Bezalel Smotrich chuan hei hi Palestinian state din tur venna atana thil ṭul niin a sawi.

Finance Minister chuan thutlukna siam a nih thu hi Pathianni khan a sawi a, eng huna siam nge tih erawh a sawilang lo. Hei hi kum thum chhunga an ram luaha Juda-te chenna tur hmun 69 siam an remtihna a ni. He thutlukna siam hma lawk hian United Nations chuan Israel-in West Bank-a a ram luah a zauh zel chungchang a lo sawisel a, international law kalh a nih thu a tarlang a ni. UN secretary-general Antonio Guterres chuan Israel thiltih chu Palestinian nena a inkar boruak a tichhe zual tih sawiin, kum 2017-2022 inkarah Israel chuan kumtin Palestinian ram a luahah Juda chenna in 12,815 a siam belh ziah a ni, a ti.

Minister Smotrich hi an ram luahah huang zauh zel thlawptu langsar tak a ni a, an thlahltute aṭanga an ram a ni tiin, huang zauh zel chu Palestinian firfiak ram dinna tur danna a ni tih a sawi tel bawk. Israel hian kum 1967 aṭangin West Bank hi a luah tawh a, Juda mi nuai nga vel an cheng mek a ni.