Israel-in Gaza Strip bei leh
Israel chuan Gaza Strip aṭanga rocket hmanga Israel chhim lam kah a nih chu chhang letin, nimin zing khan indo thlawhtheihna hmangin Gaza-a Hamas ho hmun a bomb leh.
Israel indo thlawhtheihnate hian Gaza hmarlama Hamas military wing, al-Qassam Brigades hmun pahnih bakah, khawthlang lama Qassam ho hmun eng emaw zat an bomb fuh niin Hamas official-te chuan an sawi. Mahse mihring thi leh hliam erawh an awm lo nia sawi a ni.
Thuchhuah an siamah, Israel sipai chuan fighter jet leh helicopter hmangin Hamas firfiak pawl hmun hrang hrang an bei tih an sawi. Gaza Strip aṭanga Israel chhim lama rocket kaptu hi eng pawl mahin an nih thu an la sawi lo. Mahse Israel chuan he thila mawhphurtuah hian Gaza Strip-a roreltu, Hamas te chu a puh thung. Israel sipai thuchhuah chuan, "Gaza Strip aṭanga Israel civil mite beih an nih chuan Hamas hian a nghawng a tuar zel dawn a ni," a ti. Rocket pathum an kah hi Iron Dome defence system hmanga lo kahthlaksak an nih thu a sawi bawk.
Megan David Adom emergency medical service chuan Israel chhim lam, Sderot-ah Inrinni zana Gaza Strip aṭanga rocket kahchhuah a nih avanga siren tihrik a nih hnuin, himna zawnga an tlanchhiatna lamah mi pathumin hliam an tuar a, heng mite enkawl nghal an nih thu a sawi.
Israel sipaite chuan Inrinni vek khan Israel chhim lam ramri kaltlangin Palestinian mi pahnih chu an ramah an lut ru tih an sawi. Heng mi pahnihte hian ralthuam an keng lo a, mahse thu zawhfiah tura lak nghal an ni.