California ramkang tuarte ṭanpui nan PG&E-in US dollar tld 13.5 pe dawn

California hmar lama ramkang tuarte ṭanpui (compensate) nan California firm, Pacific Gas and Electric (PG&E) chuan US dollar tluklehdingawn 13.5 pek a remti.

He ṭanpuina pawisa hi nikuma California hmar lama ramkang 'Camp fire' an tih tuarte ṭanpui nana tih a ni a, he ramkangah hian mi 86 an thih bakah, hliam mi tam tak an awm thu tarlan a ni. Thi chhungte leh in leh lo chante hnenah he ṭanpuina hi pek tum a ni. 

California hmar lama ramkang chungchangah hian PG&E hi mawhphurtua puh a ni a, an electric wire inzam chuan kangmei chu a tihpunlun thu tarlan a ni. Nikuma ramkang kha California-a ramkang avanga mi an thih nasat ber ṭum a ni bawk. 

He ramkang tuartu ṭhenkhatte chuan kumin January khan  ram kan chhanah hian PG&E hi an puh a, court-a an khin hnuah PG&E hian pawisa chawi chu a remti ta a ni. PG&E President Bill Johnson chuan ṭanpuina tam tham tak an pek dawn avangin, sum lamah harsatna an neih dawn thu tarlangin, anmahni dawrtute, ṭhenawm khawvengte leh ṭhiante bakah mimal tinte chu ṭanpui an hreh loh thu pawh inhawng takin a sawi. 

Kum 2017-a California hmar lam ram kannaah te, kum 2016-a Oakland khuaa ramkang 'Ghost Ship Fire' an tihah te leh, kum 2015-a ramkang 'Butte Fire' an tihah te PG&E hi a mawhphurtu zingah a tel thu sawi a ni. Heng ramkang avang hian civil mi nunna chan 150 chuang an awm thu leh, US dollar maktaduai chuang hu bungrua a kan chhiat thu tarlan a ni bawk.