US-in Nigeria-a helho lakah beihpui a thlak

US chuan Zirtawpni khan Nigeria hmar thlanglama inkhuar, firfiak pawl Islamic State (IS) nena inzawmna nei helho lakah beihpui a thlak. Niger ramri bul, Sokota state-a helpawl camp chu an kap fuh tih US sipai chuan a tarlang. Thi zat erawh an sawi lang lo a; mahse, US leh Nigeria official-te chuan hel eng emaw zat an thi thi an sawi.

US president Donald Trump chuan helho hian pawikhawihna an thlen fo a, a bikin pawisawi lo Kristiante an bitum fo a ni, a ti. Nigeria foreign minister Yusuf Maitama Tuggar chuan helpawl laka beihpui thlak chu US leh Nigeria thawkdunin an kalpui a ni tih sawiin, sakhaw bil kaihhnawih thil a ni lo tih a tarlang. Nigeria lamin information an pek hmangin, beihpui thlakna tur hi a hma aṭanga ruahmanna a ni tih a sawi bawk a, an bei chhunzawm zel dawn em tih erawh a sawi lang lo.

Tualchhung official chuan beihpui thlaknaah hian Lakuwara terrorist camp pawh a fuh tel tih sawiin, helpawl mi leh sa pawh eng emaw zat an thi tih a sawi a, tam tak an tlanchhe bawk a ni, a ti.

Nigeria thuneitute chuan beihpui an thlakna hmuna hel awmte chu Mali leh Niger-a hel nena inzawmna nei an ni tih sawiin, ramri bulah an member-te chu khawsain, an pawla lak luh tur an zawng ṭhin tih an sawi.