Bangladesh PM hlui Khaleda Zia a thi

Bangladesh prime minister hlui, Khaleda Zia chu hun rei tak a dam loh hnuah kum 80 mi niin an ram huna tukin zing dar 6 khan a thi.

Khaleda Zia party, Bangladesh Nationalist Party (BNP) chuan a thih thu hi an puang a, a vui hun tur erawh tarlan a la ni lo. A chuap infection neih vangin Khaleda hi November 23 khan Dhaka-a Evercare Hospital-ah dah a ni a, doctor-te chuan a thin a ṭhat loh bakah arthritis, diabetes a neih bakah a awm pawh a na tel tih an sawi.

Zia hi Bangladesh-a hmeichhe prime minister ni thei hmasa ber niin, kum 1991 khan a term khatna atan thlan tlin a ni. Kum 1996-ah a a term hnihna atan thlan tlin leh niin, kum 2001-ah prime minister term thumna chelh turin thlan tlin a ni leh bawk. Kum 2014 inthlanpui kha a boycott a, kum 2018 khan Sheikh Hasina kaihhruai sorkar chuan thuneihna a chan laia eiruknaa inhnamhnawiha puhin thubuai a siamsak a, thiam loh chantir a ni zui bawk. Hasina paihthlak a nih hnuah kumin January thla khan Supreme Court chuan a thubuaiah hian thiam a chantir a, jail aṭangin Zia hi chhuah tir a ni. November thla khan kum thara an ram inthlanpui neih turah a campaign tur thu pawh BNP chuan a lo tarlang a ni.