Trump-a'n Hamas leh Iran a vau

US president Donald Trump chuan Israel prime minister, Benjamin Netanyahu nena an inkawm zawhah news conference an neihah, Palestinian firfiak pawl Hamas chuan an ralthuam an tung lo a nih chuan a man an pek tur a nasa viau ang tih a sawi. Iran pawh vau telin, nuclear programme kalpui leh an tum a nih chuan an thil tum chu nuaibo sakah a vau bawk.

Trump leh Netanyahu-te hi Florida- Mar-a-Lago club-ah December 29 khan an inkawm a ni. Trump chuan Gaza Strip-a inkahhai thawh hnihna puanna tura hma laknaah Netanyahu nen an inkar boruak a ṭha lo nia report awm pawh a dik lo tih a tilang a, Israel chu a intiam anga a awm thu leh, a tidik lotu chu Hamas zawk an nih thu a sawi. Netanyahu chu fakin, Israel prime minister ni lo se tuna Israel hi a awm tawh lo ang, a ti.

Netanyahu pawhin inbiakna hlawk thlak tak an neih chu sawiin, Israel chuan Trump hnenah civil mi chawimawina sang ber, Israel Prize for Peace a hlan dawn tih a puang bawk. Hei hi Israel mi ni lo zingah an hlan hmasakna ber tur a ni. Chawimawina hi kum 2026-ah an hlan dawn a ni. He chawimawina hi Israel leh Juda mite tana Trump-a thawh hlawk leh thawh ṭhat avanga hlan tur an ni tih a tarlang.

Hruaitu pahnihte hi kumin January thlaa US president atana Trump lak luh a nih hnuah meeting an neih vawi ngana a ni. Meeting-ah hian Hamas leh Iran chungchang bakah, Syria leh Lebanon-a Hezbollah pawl chungchang pawh an sawi dun bawk.