Vawiinah Khaleda Zia vui dawn

Bangladesh prime minister hlui, Khaleda zia chu vawiin hian ram chawimawina nena vuiliam a ni dawn. A pasal, president hlui Ziaur Rahman thlan bulah phum a ni ang.

Khaleda Zia hi hun rei tak a dam loh hnuah nimin zing khan kum 80 mi niin a thi a ni. Bangladesh sorkar lailawk chuan Zia hi ram pumah ni thum sun a ni dawn tih a puang a, hemi chhung hian ram chhunga sorkar building leh zirna in bakah, ram pawn lama mission-ahte hnam puanzar a ngul chanvea zar a ni ang. Chief adviser Muhammad Yunus chuan ram mipuite chu Zia  sunna hun hmang tur leh, a puala ṭawngṭaina hun hmang turin a sawm. Yunus chuan mipuite chu dan leh thupek zawm turin a ngen bawk.

Parliament-a South Plaza leh a bula Manik Mia Avenue-a ṭawngṭaina hun hman zawhah, Zia vuina hun hi hman a ni dawn tih law advisor Asif Nasrul chuan a sawi. Vuina hun hman zawhah a pasal, president hlui leh BNP founder ni bawk Ziaur Rahman thlan bul, Dhaka-a Sher-e-Bangla Nagar ah phum a ni ang.