Myanmar-in I-Day pualin tang 6,134 a chhuah dawn

Myanmar sipai sorkar chuan Pathiannia an ram independence day vawi 78-na lawmna pualin jail aṭangin mi 6,134 a chhuah dawn a, tang zinga eng emaw zat hremna pawh a tihnep sak bawk.

Tang chhuah zingah hian ram dang mi 52 an tel. Hetih lai sipai sorkar dodalna lantirtu a mante chhuah zingah hian an tel em tih erawh sawichian a ni lo. Ram dang mi chhuahte hi an ram lamah thawn kir nghal an ni ang. Hremna tihnep sak zingah hian tualthat, pawngsual leh security act bawhchhiat vanga hrem eng emaw zat an tel.

Sipai sorkar chuan tang chhauhte chu dan an bawhchhe leh a nih chuan ngaihdam an nihna chu sut lehin, hremna pek thar bakah chhuah an nih hmaa an tan hun tur ruat chu an hmang zui leh dawn tiin a vau nghal a ni. Myanmar sipai sorkar hian an ram hun pawimawh pual hian jail tang eng emaw zat ngaidamin a lo chhuah tawh ṭhin. Tun ṭuma tang chhuah zingah hian an ram hruaitu hlui, Aung San Suu Kyi erawh a tel lo. Kum 2021-a sipaiin Suu Kyi kaihhruai civil sorkar thuneihna an hnehchhuh hnuah man zuiin, tun thlengin an la hreng a ni. Thubuai eng emaw zat siamsakin, a thubuaiah hian thiam loh chantir a ni bawk.

Pathianni aṭang khan tang ngaihdamte hi jail aṭangin chhuah ṭan an ni. Yangon-a Insein Prison-a tangte chu an ram huna chawhma dar 11 aṭang khan bus hmangin hruai chhuah ṭan a ni. Jail danga tangte pawh a tahtawla chhuah an ni ang.

Myanmar hi British awpna hnuaiah a awm ṭhin a, kum 1948 January 4 khan independence a hmu a ni. Independency Day lawmna hi an ram khawpui, Naypitaw-a City Hall-ah an hmang a ni.

Sipaiten thuneihna an chan hnuah nikum December aṭang khan a hmasa ber atan inthlanpui neih ṭan a ni. Inthlan hi thawh thuma neih a ni dawn a, tun thlaah vote thlak chhunzawm a ni ang.